Serhad Bapîr --- huner û raman: 2016

29/12/2016

Çerx

Ez dıbinım ku ne wusa ye

lê çı bıkım,

jı bo parastına postê xwe

ez ji bûme

hevalê rovi û gur.

Hebo hebo nas û dost çûn,

bûn gepa devê gur,

an ji dı mezatê da

bı buhayê sıfır

hatın fırotınê.

Mın her xwe parast

û rutbeyên xwe ji

bılınd kır.

Lê nıha dor hate mın,

keseki tune ye

da ku were hewarê.

Hınên dın hatın ciyê mın

û ez ji,

ketım devê topê.

2013

Reşbini 1, 1994, pênus, 28,5x21 cm

27/12/2016

Ku bi rastî jî

rastîya tiştan hebûya,

wê her kes bibûya

layiqê wî cîyê heyî.

Lê em çi bikin,

dewran dewrana fêlbazan e,

dêk û dolab bûne huner.

Û em jî di destên wan da

bûne kobay

ji bo ceribandinê

û di kûrga wan da

bûne pere

ji bo xerckirinê.

Armancên esîl

û daxwazên pîroz,

di destên wan da

bûne zibl.

Bêndera sîyasetê

û awayê xebatê,

vêca bûne sergo

û selexaneya

hêrandina rêhevalan.

2013

Reşbini 4, 1994, pênus, 28,5x21 cm

Dengûbehs

Dengûbehs

Dı welateki bênav da

mıleteki şıkesti me ez.

Mın,

jı her dagırkeri ra

xızmetkariyê kıriye,

Lê ez nebûm

xızmetkarê xwe.

Lı ser qehremantiya mın,

destan û efsane çêbûne,

lê nıha,

ez bûme,

sêwiyê ber diwaran.

Lı ber xelkê,

ez nezan û bê qimet ım,

lê lı ba xwe,

ez zehf zana me,

ez xwe xelkeki

40 mılyoni dıbinım,

ez dıbêm ku,

ez rast û bı heq ım,

lê hemû dınya

lı dıji mın e.

Ez xwe

wek pêşengê

mazlûmên dınê dızanım,

lê haya mazlûman jı mın nine

Ez koleyê

bextreşiya xwe me.

20/6/2012

Reşbini 3, 1994, pênus, 28,5x21 cm

17/12/2016

Ronakbîr

Ronakbîrên me,

pir ronak bûn.

Tiştên ku ji wan dihate xwestinê,

bi dil û can digotin.

Wan ne guh dida hişê xwe

û ne jî wujdan bi wan va mabû.

Ji mehsûlên ronakbîrîyê,

dixwestin zû zûka

nesîbên xwe bistînin.

Bênesîb mayîn,

teahlîtî û bêkesîtîya çîlekeşan bû,

divîya ku meriv ehmeq bûya

da ku bida ser şopa

xemxwar û çîlekêşan.

Erê,

ronakbîrên me yên xesandî,

bi dil û can

bûbûn berdevkên pîyaseya bi bereket.

4/3/2013

Komposizyon 3, 2009, hıbra çini û pênusên rengin, 5x6 cm

16/12/2016

Mırid

Dıbe

ku êdi mıj belavbûbe,

dimenê wunda ji, êdi xwıya dıke,

lê mıridên me,

weki her dem,

dı nav reştariya hışê xwe da,

wê disa “rasti”ya xwe bışopinın.

Ev e bê bextiya me

û sedema stûxwari û şıkestına me.

4/3/2013

Komposizyon 1, 2009, hıbra çini û pênusên rengin, 5x4,5 cm

Hunermend

Di bazara rewac da,

hunermend hunera xwe digot.

Bihayê her tiştî hebû.

Bihayê hunerê jî,

di dema xwe da,

tafil dihate dayîn.

“Navê te li dinê be”

berê dihate gotin,

lê niha, şan û şohret û navûdengî,

tenê bi xêra satelîtan çêdibûn.

Di nav şikefta tenayîtîya xwe da,

gotina gotinê,

gelek zehmet bû ji bo hunermendan.

Lê di şaneşîna camekanî da,

niha hunermend dibûn

delalîyên ber dilê nezanan

û huner jî,

di nav serabên xelkekî şikestî da

dibû abîdeya hunermendên xesandî.

4/3/2013

Mırov, 2010, hıbra çini û pênusên rengin, 4x3,5 cm

Xwebûn

Mın tu cari xwe nekır “xwe”.

Çirokên xayintiyê yên jı devê çirokbêjan,

xweşi mın dıçın.

Çı xweş e ku,

êdi ez şiyar, azad û xwedi irade me.

Ez ê bındestê bındestan,

êdi bûme xwerekê devê çirokbêjan.

3/8/2016

Teyrê lal, hıbra çini û pênusên rengin, 2004, 5,5x6 cm

Ez ê ne ez

Xwıya nake ka ez çı dıxwazım,

gaveki mın ber bı pêş

ya di ber bı paş e.

Bêy ku ez pê bıhısım,

ez bûme yek jı dıjberên xwe.

Lê sloganên mın gırover ın,

lastiki ne,

ber bı her aliyê va têne kışandınê.

Her dıbêjım ku ez serketi me

dı dema ku,

ez êdi ne ez ım.

3/8/2016

Qulıng, 2003, hıbra çini û pênusên rengin, 5,3x13,5 cm

Xwezi

Mın dıxwest,

dı şertên wekheviyê da,

anagorê çavkaniya zımanan

û anagorê hêz û taqeta zımanan,

mın rıkeberiya kurdi û tırki bıdita.

Ka wê kijan zıman

mılê xwe lı zımanê di bıxısta

û anagorê qanûnên xwezayi,

ka wê kijan zıman yê di bışkanda.

Lê ez çı bıkım,

nıha per û baskên mın

û pê û destên mın şıkênandıne.

Û disa ji dıvê ku ez bazdım

û her wusa ji,

jı çavkaniyên xwe

hêza xwe hılgırım

û karıbım bıfırım.

16/10/2014

Qulıngί, 2004, hıbra çini û pênusên rengin, 7x7,5 cm

Hut

Me lı hewşa mala xwe da ferxıkeki dit

pêşi hûrık bû, me dıgote qê jı me ye

lı ber dılê me xweşık bû.

Me armancên mezın bı pê va gırêda,

me bı mal û canê xwe xwedikır.

Gav bı gav

kevır bı kevır

xiçık bı xiçık

bı me hemûyan, bû hêz.

Ferxıkê me mezın bû

me dit ku vayê ne jı malê ye,

tenê xwina ku xwe pê têrdıkır

jı malê bû.

Nıha, me dit ku,

vayê jı aliyê xêrnexwazan va

bı mebest

û bı plan

avêtıbûn hewşa mala me ev têjık.

Nıha, êdi mezın bûye,

vêca lıbo lıbo

xwediyên malê dıhêre.

27/5/2014

Komposizyon 2, 2009, hıbra çini û pênusên rengin, 5x6 cm

His

His

Carna his tenık dıbın

dıbın pelçımeki lı ber bayê

an ji dıbın weki pêlên deryayê.

Êdi his xwe radestê guvaştına dıl

û pivan û hesab ji

dıbın mıj û dûman.

Merıv hıngê,

xweziya xwe

bı parsek û belangazan tine.

15/8/2013

Qulıng, 2004, hıbra çini û pênusên rengin, 7x7,7 cm

Ez sêwiyeki lı ber diwaran,

bêparê şiva camêran,

nezanê şıverêya diroka dınê.

Bı bındestiya xwe şadıbım

û êdi bûme rêberê mıletên serbest!

Êdi ez hatıme fêrkırın,

ez bûme pesndarê kujerên xwe.

3/8/2016

Payiza lal, 2001, hıbra çini û pênusên rengin, 5,5x8,5 cm

07/08/2016

Pêşengeha komi ya Komeleya Hunermendên Hunera Nigari ya Bakûrê Yunanistanê bı navê "Şopa Hunerê lı Olimpos"

Pêşengeha komi ya Komeleya Hunermendên Hunera Nigari ya Bakûrê Yunanistanê bı navê "Şopa Hunerê lı Olimpos" lı Navenda Mozaikê ya Derya Naverast ya Dion.
Jı 10/8/2016 heta 10/9/2016

Afişa pêşengehê

Dawetnameya pêşengehê

Dimen, 2016, rengên akrilik, 25x30 cm

13/05/2016

Hêz û hakimiyeta heri mezın ya dewleta dagırker ya Tırkan

Komeleya Nıviskarên Kurd jı bona “Roja Zımanê Zıkmaki” lı Diyarbekırê daxwiyaniyekê belavkır. Dı vê daxwiyaniyê da, lı kêleka hın tıştên di da, tê gotın ku “Li civakekê ger zimanê wî seqet be, berî her tiştî ramana wî jî birîndar dibe û ew civak bi hemû parçeyên xwe dirize.”Malpera sputniknews.com vê daxwiyaniyê bı sernıvisa 'Encama zimanê seqet ramaneke birîndar weşand. Lı ser vê ditınê ez dıxwazım du gotınan bêjım.
Bı ditına mın "Encama zımanê seqet ramaneke birindar" nine. Encama zımaneki bırindar, ramaneke seqet e, ku êdi ev ramana he ya seqet dıbêje ku pırsgırêka me bı alaya Tırkiyê, sınorên dewletên dagırker û bı zımanê tırki ra tuneye. Her ev ramana seqet, alaya Kurdıstanê wek alaya welat û mıletê xwe nasnake, lı dıji avakırına dewleta Kurdıstanê ya serbıxwe derdıkebe (her wusa ji, dıji serxwebûna başûrê Kurdıstanê ye), dı parlementoya Tırkan da sonda nıjatperest ya Tırkbûn û Tırkiyebûnê dıxweyne, "keseyatiyên" jı çepên Tırk, yên ku dı nava cıvata Tırkan da tu itibaran wan tuneye, tine dı bajarên Kurdıstanê û lı Tırkiyê da bı dengên xelkê Kurd dıke parlementer û rêberên HDP yê. Her ev xwediyê vê hızr û ramanên seqet ın ku ev e 20, 30 û 40 sal ın ku dı nav tevgera kurdi da ne, lê tu qedri nedane zımanê kurdi û fêri kurdi nebûne. Dema ku hızkırın û parastına zımanê me yê bındest û şıkesti tune be, hıngê hızkırın û daxwaza mafên me yên welati û mıleti ji dıbe sıpiçolki û tamsark. Ew kesên ku daxwaza serxwebûna Kurdıstanê avêtın çope, beriya vê yekê, bı zımanê xwe yê tırki, pêşi zımanê kurdi avêtıbûn çope.
Ev Komeleya Nıviskarên Kurd, ku jê nayê bêje ku “kesên ku bı zımanê xelkê me baş nızanın dıvê nıkarıbın bıbın serokên partiyên Kurdan, parlementer, serokên bajarvaniyan, encumenên bajarvaniyan û her wusa ji keyayên taxan ji”, hemû itibara xwe wendakıriye.
Dıbe ku dewleta zımankuj ya Tırkan per û baskê zımanê me şıkandıbe û zımanê me kırıbe zımaneki stûxwar û perişan û her wusa ji siyasetvanên Kurd bûbın pıştpala vê politikaya kurdkuj, lê zımanê me xwediyê rûmet û asaletê ye, ku ev rûmet û asalet ji, weki pıraniya zımanên dınê, jı kurayiya hezaran salan dıherıkın û tên, jı zenginti û xemla naveroka zımanê me tên.
Hêz û hakimiyeta heri mezın ya dewleta dagırker ya Tırkan ya lı ser mıletê Kurd, ne hêz û hakımiyeta leşker, tanq û topên wê ne, lê belê, hakimiyet û serdestiya zımanê tırki ye. Ku dı serdema me da, ev hakimiyet û serdestiya zımanê tırki lı ser me û dı nava me da tunebûna, hıngê ne hıkumdari û ne ji dagırkariya wan lı ser me da dıman.
22 / 2/ 2016